༄༅།།གྲི་གུ་རྩྭ་ཐང་།
ཁོད་ཡངས་པའི་རང་བྱུང་རྩྭ་ཐང་དེར་འབྱོར་ན།
རང་དབང་གི་གླུ་དབྱངས་ཤིག་ཐོལ་གྱིས་འཕྱུང་ངེས།
སྡུག་བསྔལ་ཡོད་ཚད་རང་དགར་བརྗེད་སྲིད།
སེམས་པ་དེ་བག་ཕེབས་པོར་གནས་སྲིད།
ཡོད་ཚད་ཀྱི་ཡོད་ཚད་ཁྱོད་ལ་དབང་སྲིད།
གནམ་སྔོན་དང་སྤྲིན་དཀར་འོག་གི་རྩྭ་ཐང་།
རྟ་ནོར་ལུག་གསུམ་གྱི་འཚོ་རྟེན་རེད།
ཨ་ཁུ་འབྲོག་པའི་ཕ་ས་རེད།
ཨ་ཅེ་འབྲོག་མོའི་གླུ་དབྱངས་ཀྱི་གར་སྟེགས་རེད།
ད་དུང་། ཁྱེད་དང་ང་ཡི་ཞིང་ཁམས་རེད།
༄༅།།དྭངས་ར་གཡུ་མཚོ།
མེས་པོ་ནས་མེས་པོ་བརྒྱུད་པའི།
ཡིད་ཀྱི་མཚོ་མོ།
མཐོ་སྒང་གི་ཨ་མས་གནང་བའི་ནུ་ཞོ་རེད།
ཞིམ་མངར་གྱི་ནུ་ཞོ་དེས།
སེམས་ཅན་གྲངས་མེད་ཅིག་གི་ཚེ་སྲོག་བསྐྱབས་ཡོད།
མེས་པོ་ནས་མེས་པོ་བརྒྱུད་པའི།
ཡིད་ཀྱི་མཚོ་མོ།
མཐོ་སྒང་གི་ཨ་ཕས་རྩྭ་ཐང་ལ་ཕུལ་བའི་ཡོན་ཆབ་རེད།
བདུད་རྩིའི་ཡོན་ཆབ་དེས།
འགྲོ་བ་མང་པོ་ཞིག་ལ་རྒྱུ་འབྲས་ཀྱི་ཆོས་ཉིད་བསྟན།
༄༅།།ཡར་ལྷ་ཤམ་པོ།
གངས་དཀར་གྱི་ཅོད་པན་གཙུག་ཏུ་བཞེས་པའི།
སྲིད་པའི་གངས་རྒན་ཁྱོད།
ས་གཞིའི་ཕུན་ཚོགས་རེད།
འཇིག་རྟེན་གྱི་མིག་འབྲས་རེད།
སེམས་པ་དང་སེམས་པས་བསྐུར་བའི།
གངས་རྒན་ཁྱོད་ལ།
སྙན་ངག་གི་མཆོད་པ་ཞིག་འབུལ་འདོད།