འདི་ག་ཚགས་པར་ཁང་དུ་ལྷ་ས་ནས་ཟླ་12ཚེས་26ཉིན་གནས་ཚུལ་འབྱོར་གསལ། ཚེས་25ཉིན། “ཚོང་ཁང་བརྒྱ་བཙུགས་ནས་སློབ་ཐོན་སློབ་མ་སྟོང་ལ་རོགས་སྐྱོར་བྱེད་པའི”སྒྲོག་འགྲེལ་དང་ལྗོངས་ཐད་གཏོགས་དཔེ་སྟོན་ས་ཚིགས་ཀྱི་སྒོ་བྱང་སྤྲོད་པའི་མཛད་སྒོ་ལྷ་ས་གྲོང་ཁྱེར་དུ་འཚོགས་ཤིང་། གྲོང་ཁྱེར་དང་ས་ཁུལ་ཁག་གི་མི་སྤྱི་ཅུས་དང་ལས་ཞུགས་ཅུས། སྒོ་བྱང་སྤྲོད་པའི་མཉམ་ལས་སྒྲིག་གཞི་དང་ལས་གཏོད་དཔེ་སྟོན་ས་ཚིགས་བཅས་ཀྱི་འཐུས་མི་དང་། ལྷ་ས་གྲོང་ཁྱེར་གྱི་ལས་གཏོད་བྱེད་འདོད་ཡོད་པའི་མཐོ་སློབ་སློབ་ཐོན་སློབ་མ་དང་འབྲིང་རིམ་ལས་རིགས་སློབ་གྲྭའི་སློབ་ཐོན་སློབ་མ་སོགས་ཁྱོན་མི་200ལྷག་ཙམ་ཞུགས་ཡོད་པ་རེད།

ངོ་སྤྲོད་བྱས་པར་གཞིགས་ན། “ཚོང་ཁང་བརྒྱ་བཙུགས་ནས་སློབ་ཐོན་སློབ་མ་སྟོང་ལ་རོགས་སྐྱོར་བྱེད་པའི”ཆེད་དོན་བྱ་སྤྱོད་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ལས་ཞུགས་ལས་གཏོད་ལས་དོན་ལ་ཤུགས་སྣོན་རྒྱག་པའི་བྱེད་ཐབས་གལ་ཆེན་ཞིག་ཡིན་པ་དང་། ཆེད་དོན་བྱ་སྤྱོད་དེ་འདི་ལོའི་ཟླ་ལྔ་པའི་ཟླ་མཇུག་ནས་སྤེལ་ཚུན་ལྗོངས་ནང་ཁུལ་གྱི་མཐོ་སློབ་སློབ་ཐོན་སློབ་མ་40ལ་རྒྱབ་སྐྱོར་བྱས་ནས་ཁེ་ལས་ཀྱི་དངོས་ཚན་23བཙུགས་པ་དེ་དག་གིས་མི་200ཙམ་ལས་ཞུགས་ཐུབ་རྒྱུར་སྣེ་ཁྲིད་ཐུབ་ཡོད་པ་རེད།

（དམ་ཆོས་མི་ཕམ་གྱིས་བསྒྱུར། པ་སངས་ཚེ་རིང་གིས་ཞུས）