རང་སྐྱོང་ལྗོངས་དབུ་བརྙེས་ནས་ལོ་55འཁོར་ཚུན་དང་ལྷག་པར་དུ་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ལྗོངས་ཡོངས་ཀྱི་སློབ་གསོའི་ཁོངས་གཏོགས་ཀྱིས་ཀུན་སྤྱོད་ལ་བརྟེན་ནས་མི་སྣ་སྐྱོང་བའི་གཞི་རྩའི་ལས་འགན་ལ་དམ་པོར་དམིགས་ནས་སློབ་གསོའི་བྱ་གཞག་སྔོན་ལ་འཕེལ་རྒྱས་གཏོང་བ་མཐའ་འཁྱོངས་བྱས་ཏེ། སློབ་གསོའི“འབད་འབུངས་ཀྱི་ལེའུ”ཡག་པོ་རྩོམ་པ་དམ་འཛིན་བྱ་གཞིར་བྱེད་པ་དང་སློབ་གསོ་ཆ་འཕྲིན་ཅན་གྱི་འདེགས་སྐྱོར་བྱས་པས་རིམ་པ་ཁག་དང་རིགས་ཁག་གི་སློབ་གསོ་རྒྱུན་མཐུད་དང་མགྱོགས་མྱུར་འཕེལ་རྒྱས་ཕྱིན་པ་མ་ཟད། ད་དུང་སློབ་གསོའི་སྤུས་ཚད་བརྟན་པོའི་ངང་ལེགས་སུ་ཕྱིན་ནས་སློབ་གསོ་དེང་རབས་ཅན་ལ་སྐུལ་འདེད་གཏོང་ཆེད་རྨང་གཞི་བཟང་པོ་བཏིང་ཡོད་པ་རེད།
བསྡོམས་རྩིས་བྱས་པར་གཞིགས་ན། མིག་སྔའི་བར་ལྗོངས་ཡོངས་སུ་རིམ་པ་ཁག་དང་རིགས་ཁག་གི་སློབ་གྲྭ་2995ཡོད་པ་དང་སློབ་གྲྭ་འགྲིམ་མུས་ཀྱི་སློབ་མ་ཁྲི་84.15(དེའི་ནང་ལྗོངས་ཕྱིའི་སློབ་མ་88530ཚུད་ཡོད)ཡོད་པ་རེད། 2019ལོར་ལྗོངས་ཡོངས་ཀྱི་སློབ་ཆུང་གི་སློབ་ལོ་ལོན་པའི་སློབ་མ་སློབ་གྲྭར་ཞུགས་ཚད་99.71%ཟིན་པ་དང་། དམའ་འབྲིང་གི་ན་འདྲེས་སློབ་མ་སློབ་གྲྭར་ཞུགས་ཚད་102.88%ཟིན་པ། མཐོ་རིམ་སློབ་འབྲིང་དུས་མཚམས་ཀྱི་ན་འདྲེས་སློབ་མ་སློབ་གྲྭར་ཞུགས་ཚད་86.62%ཟིན་པ། མཐོ་རིམ་སློབ་གསོའི་ན་འདྲེས་སློབ་མ་སློབ་གྲྭར་ཞུགས་ཚད་47.65%ཟིན་པ། སློབ་ཞུགས་གོང་གི་ལོ་གསུམ་གྱི་སློབ་གསོའི་ན་འདྲེས་བྱིས་པ་བུ་བཅོལ་ཁང་དུ་ཞུགས་ཚད་84.42%ཟིན་ཡོད་པ་རེད།
ད་ཆ་སློབ་མ་དེ་བས་མང་བ་ཕུགས་འདུན་མངོན་འགྱུར་བྱ་ཆེད་མཛེས་སྡུག་ལྡན་པའི་འབྱུང་འགྱུར་གྱི་ཕྱོགས་སུ་སྐྱོད་བཞིན་ཡོད།
← འཕྱོངས་རྒྱས་རྫོང་རྒྱལ་སྨན་ཤང་གི་སློབ་ཆུང་སློབ་མ་ཡེ་ཤེས་ཟླ་བ(གཡས)དང་ཉི་མ་དབྱངས་ཅན(གཡོན)གྱིས་ཡངས་པའི་སློབ་ཁང་དུ་སློབ་མ་ཚོ་དང་མཉམ་དུ་སློབ་གསོ་ལས་བྱུང་བའི་སྤྲོ་སྣང་ཉམས་སུ་མྱོང་བཞིན་པ།