འདི་ག་ཚགས་པར་ཁང་དུ་ལྷ་ས་ནས་གནས་ཚུལ་འབྱོར་གསལ། ཉེ་དུས། བོད་ལྗོངས་སྦྲང་ནོར་བུ་གསོ་ཚགས་ཡན་ལག་ཚོགས་པ་དངོས་སུ་བཙུགས་པ་དེ་ཐོག་ནས་ལྗོངས་ཡོངས་སུ་སྦྲང་ནོར་བུ་གསོ་ཚགས་ལས་རིགས་ཀྱི་རྩ་འཛུགས་སྒྲིག་གཞི་མེད་པའི་ལོ་རྒྱུས་མཇུག་འགྲིལ་བ་རེད། གསར་འགོད་པས་བོད་ལྗོངས་རྩི་ཤིང་སྲུང་སྐྱོང་རིག་ཚོགས་2020ལོའི་རིག་གཞུང་སྤེལ་རེས་དང་བོད་ལྗོངས་སྦྲང་ནོར་བུ་གསོ་ཚགས་ཡན་ལག་ཚོགས་པ་བཙུགས་པའི་ཚོགས་ཆེན་ནས་ཤེས་རྟོགས་བྱས་པར། ཡན་ལག་ཚོགས་པ་དེ་ནི་བོད་ལྗོངས་རྩི་ཤིང་སྲུང་སྐྱོང་རིག་ཚོགས་ཀྱི་རིམ་པ་གཉིས་པའི་རིག་ཚོགས་ཤིག་ཡིན་པ་དང་ཆེད་མངགས་བོད་ཀྱི་སྦྲང་ནོར་བུར་ཞིབ་འཇུག་དང་ཐོན་ལས་འཕེལ་རྒྱས་ཀྱི་སྤྱི་འགན་འཁུར་གྱི་ཡོད་པ་རེད།

ཤེས་རྟོགས་བྱུང་བར་གཞིགས་ན། མིག་སྔར། རང་ལྗོངས་སུ་ཕྱི་རྒྱལ་གྱི་སྦྲང་ནོར་བུའི་ཁྱུ་6000ཡོད་པ་དང་། སྦྲང་ནོར་བུ་གསོ་ཚགས་སྣེ་ཁྲིད་པ་30ལྷག་ཙམ་ཡོད་པ་མ་ཟད། སྦྲང་ནོར་བུ་གསོ་ཚགས་ཀྱི་མཉམ་ལས་ཁང་8བཙུགས་པས་སྦྲང་རྩི་ཕྱིར་ཚོང་ལོར་ཡོང་འབབ་སྒོར་ཁྲི་ཉིས་སྟོང་ཙམ་ཟིན་གྱི་ཡོད་པ་རེད།

ལོ་16གི་གོང་དུ་རང་ལྗོངས་སུ་སྦྲང་ནོར་བུ་གསོ་ཚགས་ཀྱི་ལས་རིགས་དེ་ཧ་ལམ་སྟོང་པ་ཡིན་ཞིང་། 2004ལོ་ནས་བཟུང་ལྗོངས་ཞིང་འབྲོག་ཚན་རིག་ཁང་ཞིང་ལས་ཞིབ་འཇུག་སུའོ་ཡི་ཚན་ཞིབ་མི་སྣས་ཕྱི་རྒྱལ་གྱི་སྦྲང་ནོར་བུ་ནང་འདྲེན་བྱས་ནས་ས་བབ་མཐོ་བའི་ས་ཁུལ་དུ་ཕྱི་རྒྱལ་གྱི་སྦྲང་ནོར་བུ་གསོ་ཚགས་བྱེད་པའི་ཉམས་མྱོང་ཕྱོགས་སྡོམ་བྱས་པས། སྦྲང་ནོར་བུར་གཡོག་བྱེད་བྱེད་ཐབས་དང་གསོ་ཚགས་བྱེད་ཐབས་ལེགས་བཅོས་བྱུང་བ་མ་ཟད། ས་གནས་དེ་རང་གི་སྦྲང་ནོར་བུ་གསོ་ཚགས་བྱེད་མཁན་དུད་ཚང་སྐྱེད་སྲིང་ཐུབ་སྟེ་ཕན་འབྲས་བཟང་ཙམ་ཐོན་ཡོད་པ་རེད།