འདི་ག་ཚགས་པར་ཁང་དུ་ལྷ་ས་ནས་ཟླ་5ཚེས་13ཉིན་གནས་ཚུལ་འབྱོར་གསལ། ཚེས་12ཉིན་གྱི་ཕྱི་དྲོར། ལྗོངས་ཏང་ཨུད་ཀྱི་རྒྱུན་ཨུ་རང་སྐྱོང་ལྗོངས་ཀྱི་རྒྱུན་ལས་ཀྲུའུ་ཞི་གཞོན་པ་ནོར་བུ་དོན་གྲུབ་ཀྱིས་རང་སྐྱོང་ལྗོངས་ས་མཐོའི་སྐྱེ་དངོས་ཐོན་ལས་ཀྱི་ཆེད་དོན་རྣམ་གྲངས་སྐུལ་འདེད་ཚོགས་ཆུང་གི་ཆེད་དོན་ཚོགས་འདུ་གཙོ་སྐྱོང་གནང་ཞིང་། ནོར་ནག་ཐོན་ལས་དང་བོད་ལུགས་གསོ་རིག་སོགས་ས་མཐོའི་སྐྱེ་དངོས་ཐོན་ལས་ལས་དོན་གྱི་སྙན་སེང་གསན་ནས་ས་མཐོའི་སྐྱེ་དངོས་ཐོན་ལས་འཕེལ་རྒྱས་ཀྱི་བསམ་ཕྱོགས་སྔར་བས་གསལ་པོ་བཟོ་བ་དང་གོམ་སྟབས་རྗེས་མའི་ལས་དོན་བཀོད་སྒྲིག་གནང་བ་རེད།

རང་སྐྱོང་ལྗོངས་ཀྱི་ཀྲུའུ་ཞི་གཞོན་པ་རྒྱལ་མཚན་དང་ལུའོ་མེ་ཚོགས་འདུར་ཕེབས་པ་རེད།

ནོར་བུ་དོན་གྲུབ་ཀྱིས། རིམ་པ་ཁག་དང་སྡེ་ཚན་ཁག་གིས་ཚད་མཐོའི་མཐོང་ཆེན་བྱས་ཏེ་རྨང་གཞིའི་རང་བཞིན་གྱི་ལས་དོན་ཡག་པོ་སྒྲུབ་དགོས་ཤིང་། ཐོན་ལས་འཕེལ་རྒྱས་ཀྱི་ཁ་ཕྱོགས་གསལ་སྟོན་གྱིས་སྲིད་ཇུས་ཞིབ་འཇུག་ལ་ཤུགས་སྣོན་རྒྱག་པའི་གནད་སྨིན་རྒྱབ་སྐྱོར་བྱེད་ཤུགས་ཆེ་རུ་གཏོང་དགོས་པ་དང་། རང་བྱུང་དང་། ཁྲོམ་ར། ཚན་རྩལ་བཅས་ཀྱི་ཆོས་ཉིད་ལ་བརྩི་འཇོག་བྱེད་པ་དང་། ལྗང་མདོག་འཕེལ་རྒྱས་མཐའ་འཁྱོངས་བྱེད་པ། རྒྱུད་བཟང་གི་ལེགས་ཆ་འདོན་སྤེལ་བྱེད་པ། ཚན་རྩལ་དང་མ་དངུལ་གཏོང་ཚད་ཆེ་རུ་གཏོང་བ། མ་འཇོག་བྱེད་སྟངས་གསར་གཏོད་བྱེད་པ། ཚན་ཞིབ་ཀྱི་ཆུ་ཚད་མཐོ་རུ་གཏོང་བ། མཐིལ་རྟོགས་པ་དང་ཚད་གཞི་གཏན་འཁེལ་ཏན་ཏིག་བྱེད་པ། ཐོན་ཁུངས་འབེལ་པོ་དང་། ཐོན་སྐྱེད་ཀྱི་ལུགས་མཐུན་རང་བཞིན། སྐྱེ་འཕེལ་དང་འཕར་བའི་ཆོས་ཉིད་བཅས་དང་བསྟུན་པ་སོགས་བྱས་ཏེ་ནོར་ནག་ཐོན་ལས་ཀྱི་བར་མཐོངས་ཁྱབ་ཚུལ་བཀོད་སྒྲིག་འོས་འཚམ་བྱེད་པ་དང་སྤུས་ཚད་མཐོ་བའི་ཐོན་རྫས་ཐོན་སྐྱེད་བྱས་ནས་རིམ་བཞིན་ཁྲོམ་ར་རྩེ་གྲ་གཏོད་དགོས། ཡུལ་དེ་རང་གི་དོན་དངོས་ལ་གཞི་ཚུགས་ཏེ། ཚན་རིག་དང་མཐུན་པའི་ངང་ས་མཐོའི་གཟན་རྩྭའི་རིགས་འཕེལ་རྒྱས་བཏང་ནས་ནོར་ནག་ཐོན་ལས་ཀྱི་རྒྱ་སྟོབས་ཆེ་རུ་འགྲོ་བར་འདེགས་སྐྱོར་བྱེད་དགོས་པ། བོད་ལུགས་གསོ་རིག་གི་འཕེལ་རྒྱས་ཐད་རྩེ་རིམ་ཇུས་འགོད་ཡག་པོ་བྱས་ཏེ“རྩེ་གྲ་བཞི”གཏོད་པར་དམ་པོར་དམིགས་ནས་བོད་ལུགས་གསོ་རིག་འཕེལ་རྒྱས་གཏོང་བར་དམིགས་ཚད་གཏན་འཁེལ་ཡག་པོ་བྱེད་དགོས་པ། སྲིད་ཇུས་དང་ཚན་རྩལ་གྱིས་འདེགས་སྐྱོར་བྱེད་ཤུགས་ཆེ་རུ་གཏོང་བ་དང་། ཚན་ཞིབ་ཀྱི་སྟོབས་ཤུགས་ཆེ་རུ་གཏོང་བ། མགྱོགས་མྱུར་འགག་སྒྲོལ་བྱེད་པ། བོད་ལུགས་གསོ་རིག་གི་སྤུས་ཚད་ནུས་ཤུགས་ཡོད་རྒུས་མཐོ་རུ་གཏོང་བ་བཅས་བྱས་ཏེ་བོད་ལུགས་གསོ་རིག་གི་སྲོལ་རྒྱུན་རིག་གནས་ལ་དགེ་སྤེལ་སྐྱོན་སྤང་བྱེད་དགོས། འགྲན་རྩོད་ལམ་སྲོལ་བཙུགས་པ་དང་ཁེ་ལས་དང་ཁྲོམ་རའི་ནུས་པ་སྔར་བས་འདོན་སྤེལ་བྱས་ཏེ་ཚན་ཞིབ་གྲུབ་འབྲས་གཞན་སྒྱུར་དང་ཁྱབ་གདལ་གཏོང་ཤུགས་ཆེ་རུ་བཏང་ནས་ཐོན་ལས་མཉམ་ལས་དང་རིག་གནས་མཉམ་འདྲེས་ལ་སྐུལ་འདེད་གཏོང་བ་བཅས་བྱེད་དགོས་པའི་ནན་བཤད་གནང་བ་རེད།