བསམ་མ་ཤེས་པའི་ཤ་རྡོག་གཅིག་དེ།
འགྲོ་འདུག་ལ་ཚེགས་མེད་ཅིང་།
གོ་བཤད་ལ་ཐོགས་མེད་པའི།
ཚུལ་ཁྲིམས་ཅན་ཞིག་ཏུ་སྐྱོང་མཛད།
དྲིན་ཆེན་གྱི་མ་ལོ།
ལོ་ཟླ་ཡི་ཁུར་པོས་བསྣན་ཏེ།
སྐུ་གཟུགས་རྩ་རིའི་སྨྱུག་མ།
མཚོན་གྱི་གཞུ་ལྟར་གུག་རུང་།
གཞུང་དྲང་གཤིས་རྒྱུད་མངའ་བ།
དྲིན་ཆེན་གྱི་མ་ལོ།
འཚོ་བའི་དཀའ་སྡུག་གིས་མནར་ཏེ།
དབུ་སྐྲ་སི་ལིང་ལྗང་པ།
སྐྱ་ཕྱེད་སྔོ་ཕྱེད་དུ་གྱུར་མོད།
ནམ་ཡང་སྤྲོ་སྣང་གིས་ཕྱུག་པ།
དྲིན་ཆེན་གྱི་མ་ལོ།
འབྱུང་གཞི་ནད་ཀྱིས་མནར་ཏེ།
གསུང་སྐད་བྱེའུ་ཆུང་འཇོལ་མོ།
དབ་དིབ་མི་སྙན་ལ་གྱུར་མོད།
ཤ་ཚའི་སྙིང་གཏམ་ལ་ཆད་མེད།
དྲིན་ཆེན་གྱི་མ་ལོ།
ཆོས་ཉིད་དུས་ཀྱི་ཕོ་ཉས།
གཉེར་རིས་བཙན་གྱིས་བྲིས་རྐྱེན།
ལང་ཚོའི་གཟི་མདངས་ཡལ་མོད།
བྱམས་བརྩེའི་ཞལ་མདངས་མ་ཉམས།
དྲིན་ཆེན་གྱི་མ་ལོ།
དལ་འབྱོར་མི་ལུས་ཀྱི་རིན་ཆེན།
འཆི་བའི་འཇིགས་པ་ཐུག་ཀྱང་།
སེམས་པ་བུ་ལ་འཁྲེང་བའི།
ཡོད་ཚད་བློས་གཏོང་ལ་དཔའ་བ།
དྲིན་ཆེན་གྱི་མ་ལོ།