ཧོ་ཧྥེ་གྲོང་ཁྱེར་སློབ་འབྲིང་སོ་ལྔ་པ་ནི་ཨན་ཧུའེ་ཞིང་ཆེན་སློབ་གསོའི་བོད་སྐྱོར་གྱི་སློབ་གྲྭ་ཞིག་ཡིན་པ་དང་སློབ་གྲྭ་དེར་ཁྱོན་བོད་རིགས་སློབ་མ་694ཡོད། ལོ་ལྟར་དགུན་ཁའི་གུང་གསེང་རིང་བོད་རིགས་སློབ་མ་ཁག་གཅིག་ལམ་ཐག་རིང་བའི་རྐྱེན་གྱིས་ཕ་ཡུལ་དུ་ལོག་མ་ཐུབ་པར་སློབ་གྲྭར་སྡོད་དགོས་འཁེལ་ཡོད། འདི་ལོའི་དགུན་ཁའི་གུང་གསེང་རིང་། སློབ་གྲྭའི་འཛིན་གྲྭ་19ཡི་བོད་རིགས་སློབ་མ་453སློབ་གྲྭར་བསྡད་ཡོད།

ཏོག་གསར་གློ་ཚད་ཀྱི་རིམས་ནད་ཐོན་རྗེས། ཧོ་ཧྥེ་གྲོང་ཁྱེར་སློབ་འབྲིང་སོ་ལྔ་པས་མགྱོགས་མྱུར་བྱ་སྤྱོད་སྤེལ་ནས་ལུགས་རྙིང་ལོའི་བཅུ་གཉིས་པའི་ཚེས་28ཉིན་ནས་བཟུང་སློབ་གྲྭ་བཀག་སྡོམ་བྱས་པ་དང་འབྲེལ་མི་139ལས་གྲུབ་པའི་སྲུང་སྐྱོང་དཔུང་ཁག་བཙུགས་ཏེ། འཛིན་གྲྭའི་ཀྲུའུ་རེན་དང་། སློབ་གྲྭའི་སྨན་པ། རྒྱབ་ཕྱོགས་མཁོ་སྒྲུབ། བདེ་སྲུང་སོགས་ཀྱི་ལས་དོན་པ་སློབ་གྲྭར་བསྡད་དེ་མཉམ་དུ་བོད་རིགས་སློབ་མ་453གྱི་བདེ་ཐང་སྲུང་སྐྱོང་བྱས་པ་རེད།

ད་ཆ་སློབ་གྲྭར་ཡོད་པའི་བོད་རིགས་སློབ་མ་453ཡི་ནང་ནས་སློབ་མ་གཅིག་ལའང་རིམས་ནད་འགོས་མེད། དྲ་ཐོག་ནས་སློབ་ཚན་འཁྲིད་པ་དང་སློབ་གྲྭའི་སློབ་ཁྲིད་སྒྲིག་ལམ་ཡང་རིམ་བཞིན་སླར་གསོ་ཡོང་བཞིན་ཡོད།