—༡—
མཚམས་འདིར། རླུང་ཡན་ངེས་མེད་དུ་ལྡང་ཞིང་སྐྱེ་བོའི་སེམས་པ་རླབས་བཞིན་གཡོ།
མཚམས་འདིར། གོས་དཀར་ལྷབ་ལྷུབ་ཏུ་གཡོ་ཞིང་བརྩེ་བ་ལྷོག་ལྷོག་ཏུ་འབར།
ལོ་འདིར། ལོ་རྒྱུས་ཀྱི་ཟིན་ཐོར་མ་འཁོད་པའི་གདོན་འདྲེ་ཧད་ཀྱིས་བཅར།
ལོ་འདིར། གཉོམ་དུང་དུང་གི་ཚེ་སྲོག་དུ་མ་གདོན་འདྲེའི་མཆེ་བའི་བར་དུ་ཚུད།
—༢—
ཏོག་དབྱིབས་ནད་དུག
ཡུལ་གྱི་གཤེད་མ། བྱུར་གྱི་སྣ་འདྲེན།
སྙིང་རྗེ་མེད་པའི་གཤོག་ལྕག་དྲག་པོ་མི་ཡུལ་དུ་རྡེག
མིག་ཆུས་བྲིས་པའི་གཏམ་རྒྱུད་ནག་པོ་ལོ་རྒྱུས་ཀྱི་པང་དུ་སྦས།
ཡིན་ནའང་། མི་ཡུལ་ནི་བརྩེ་བས་བཞེངས་པའི་མཁར་རྫོང་ཞིག
མི་སེམས་ནི་སྙིང་རྗེ་རྡོག་ཏུ་སྒྲིལ་བའི་གྲུ་གུ་ཞིག
ཁྱོད་ཇི་ལྟར་ཚེར་མ་བཞིན་མི་ཡུལ་དུ་ཤོར་ཡང་།
མི་ཡུལ་གྱི་མཁར་རྫོང་ནམ་ཡང་འགྱེལ་མི་སྲིད།
མི་སེམས་ཀྱི་གྲུ་གུ་ནམ་ཡང་འཐོར་མི་སྲིད།
ལྟོས་ཤིག ལྟོས་ཤིག
—༣—
གོས་དཀར་ལྷ་རྗེ། སེམས་ཀྱི་ཉི་ཟླ།
དྲོ་སོབ་སོབ་ཀྱི་རང་ཁྱིམ་རིང་དུ་བསྐྱུར།
སེམས་དུང་དུང་གི་ནང་མི་གདུང་བས་གྱེས།
ནད་དུག་གིས་ནམ་མཁའ་སྦགས་པའི་འཇིག་རྟེན་དེ་རུ།
རང་གི་ཚེ་སྲོག་འབེན་དུ་བཙུགས་ནས་གཡུལ་སར་ཞུགས།
འཇིགས་སྐྲག་དང་ངལ་བ་ཡོད་ཚད་སེམས་ཀྱིས་མིད།
རྔུལ་ཆུ་དང་མིག་ཆུ་ཡོད་ཚད་སྙིང་སྟོབས་སུ་བསྒྱུར།
ཉག་ཕྲ་བའི་རང་གི་ཚེ་སྲོག་གི་དབུགས་རྒྱུན་རེ་རེས།
མི་སྲོག་སྐྱོབ་པའི་རྣམ་ཐར་རེ་རེ་ལོ་རྒྱུས་ཀྱི་དེབ་ཐེར་དུ་བཀོད།
དཔའ་བོའི་རང་སྒྲ་སྒུལ་ཤུགས་ཀྱི་དབྱངས་རྟ་རུ་འདྲེན་དུས།
ཏོག་དབྱིབས་ནད་དུག
ང་ཚོ་ཁྱོད་ལ་སྐྲག་དོན་ཅི།
ཁྱོད་སྔ་ཙམ་མི་ཡུལ་ནས་ཡལ་ན་དགའ།
ཏོག་དབྱིབས་ནད་དུག
ཡུལ་གྱི་གཤེད་མ། བྱུར་གྱི་སྣ་འདྲེན།
ཁྱོད་ཇི་ལྟར་ཚེར་མ་བཞིན་མི་ཡུལ་དུ་ཤོར་ཡང་།
མི་ཡུལ་གྱི་མཁར་རྫོང་ནམ་ཡང་འགྱེལ་མི་སྲིད།
མི་སེམས་ཀྱི་གྲུ་གུ་ནམ་ཡང་འཐོར་མི་སྲིད།
ལྟོས་ཤིག ལྟོས་ཤིག
—༤—
ཀྲུང་ཧྭ་ཡི་འགོ་དམངས། སེམས་ཀྱི་ཉི་ཟླ།
དཔོན་ཉམས་དང་སྒེར་འཛིན་མེད་པའི་རྒྱལ་ཁབ་ཀྱི་དབུ་ཁྲིད།
བག་འཁུམས་དང་དངངས་འདར་མེད་པའི་གསར་བརྗེའི་དཔོན་དམག
ནད་དུག་གི་རྡུལ་ཟེགས་འཕྱུར་བའི་འཇིག་རྟེན་འདི་རུ།
བཀོད་འདོམས་དང་གདོང་མཆོངས་ཀྱི་ང་རོས་གནམ་ས་གཡོས་ཤིང་།
ནད་དུག་གི་སྙིང་རྩ་དྲུངས་ནས་འབྱིན་པའི་གཡུལ་ས་བརྒལ་དུས།
ཏོག་དབྱིབས་ནད་དུག
ང་ཚོ་ཁྱོད་ལ་སྐྲག་དོན་ཅི།
ཁྱོད་སྔ་ཙམ་མི་ཡུལ་ནས་ཡལ་ན་དགའ།
ཏོག་དབྱིབས་ནད་དུག
ཡུལ་གྱི་གཤེད་མ། བྱུར་གྱི་སྣ་འདྲེན།
ཁྱོད་ཇི་ལྟར་ཚེར་མ་བཞིན་མི་ཡུལ་དུ་ཤོར་ཡང་།
མི་ཡུལ་གྱི་མཁར་རྫོང་ནམ་ཡང་འགྱེལ་མི་སྲིད།
མི་སེམས་ཀྱི་གྲུ་གུ་ནམ་ཡང་འཐོར་མི་སྲིད།