ཏོག་དབྱིབས་གློ་ཚད་གསར་པ། །
རྒྱལ་ཡོང་ཁྱོན་ལ་ཁྱབ་དུས། །
གོང་རིམ་བཀའ་ལ་ཉན་ནས། །
རང་ས་རང་གིས་སྲུང་རོགས། །
ཕྱོགས་ལ་གང་བྱུང་མ་ཕེབས། །
མི་མང་འདུ་འཛོམས་མ་གནང་། །
ནད་དུག་འཇིགས་པ་ཆེན་པོ། །
ག་ནས་འགོས་མིན་མི་ཤེས། །
ནད་དུག་འགོ་ཤུགས་ཆེ་བས། །
གང་བྱུང་འབྲེལ་འདྲིས་མ་གནང་། །
ཁྱེད་རང་བློ་ཁོག་ཆེ་ཡང་། །
ནད་ཀྱིས་ཐར་པ་མི་གཏོང་། །
བརྒྱ་ལོར་རྩ་ཆེན་ཡིན་ཡང་། །
ནད་དུག་ཡོད་སར་མ་འགྲོ། །
མི་ཆུང་གཏེ་པོ་གཅིག་གིས། །
ལུང་པ་ཡོང་རྫོགས་བརྫད་ཡོང་། །
གལ་སྲིད་འགྲོ་དགོས་བྱུང་ན། །
ཡིན་ཅིག་ཁ་རས་རྒྱག་རོགས། །
བར་དུ་བཟོས་པའི་ཁ་རས། །
ནད་དུག་འགོག་ནུས་མི་འདུག །
ཁ་རས་རྒྱག་ལུགས་རྒྱག་སྟངས། །
སྨན་པ་མང་པོས་གསུངས་སོང་། །
འདི་གར་མི་ཆུང་བདག་གིས། །
ཡང་བསྐྱར་ཤོད་དགོས་མི་འདུག །
ཡག་ཤོས་ནང་གི་ཡག་ཤོས། །
རང་གི་ཁྱིམ་དུ་བཞུགས་རོགས། །
རང་གི་ཁྱིམ་དུ་བཞུགས་ན། །
ནད་དུག་འགོས་དོགས་མི་འདུག །
ཁྱིམ་ལ་ཕྱག་ལས་མེད་ན། །
གཙང་སྦྲ་བྱས་ནས་བཞུགས་རོགས། །
གཙང་སྦྲ་བྱེད་རྒྱུ་མེད་ན། །
བརྙན་འཕྲིན་བལྟས་ནས་བཞུཌ་རོཌ། །
བརྙན་འཕྲིན་བལྟས་པའི་ནང་ནས། །
གསར་འགྱུར་མང་ཙམ་བལྟ་རོགས། །
གསར་འགྱུར་མང་ཙམ་བལྟས་ན། །
གང་དང་ཅི་ཡང་ཤེས་ཡོང་། །
ལུས་ལ་ནད་གཞི་ཕོག་པ། །
ཁ་ནས་འཛུལ་བ་ཡིན་འདུག །
ཁ་ཡི་ནང་ལ་སྐྱེལ་མཁན། །
ལག་པ་གཉིས་པོ་ཡིན་འདུག
དུས་དང་རྣམ་པ་ཀུན་ཏུ། །
ལག་པ་ཡང་ཡང་བཀྲུ་རོགས། །
ནད་གཞི་ཆེ་མིན་ཆུང་མིན། །
སྔོན་མོའི་ཆུ་ལ་བསྐྱུར་རོགས། །
“དབྱར་ཁ་འོང་ཁའི་དཀྱིལ་ལ། །
སྐྱེ་རྒྱུ་མང་པོ་སྐྱེས་ཡོང་། །
སྐྱེས་ཚད་ཞལ་ལ་མཆོད་ན། །
ནག་པོའི་དུག་དང་འཕྲད་ཡོང”
གོང་གསལ་རང་རེའི་དམངས་གཞས།།
ཐུགས་ཀྱི་གཏིང་ལ་ཞོག་རོགས། །
ལྟོགས་ཤི་ཐེབས་དོགས་མེད་ན། །
མིག་གིས་མཐོང་ཚད་མ་མཆོད། །
རི་དྭགས་ཤི་ཉེར་ཐུག་ཀྱང་། །
ལག་པ་གང་བྱུང་མ་རྒྱག །
ཁྱེད་རང་སྙིང་རྗེ་ཆེ་ཡང་། །
ནད་ལ་སྙིང་རྗེ་མིན་འདུག
འཚོ་བར་དཀའ་ངལ་ཡོད་ཀྱང་། །
གནས་སྐབས་ནང་དུ་བཞུགས་རོཌ། །
ནད་དུག་མཐའ་ལ་ཐོན་རྗེས། །
ག་པར་འགྲོ་ཡང་སོང་ཞིག །
ནང་ལ་ནད་པ་ཡོད་ན། །
སྨན་པ་དུས་ཐོག་བསྟེན་རོགས། །
ཏོག་དབྱིབས་ནད་ལ་ཞེད་ནས། །
དུས་མིན་འཆི་བ་ཐོན་ཡོང་། །
ཕྱུག་པོས་ཞལ་འདེབས་འབུལ་གྱིས། །
སྨན་པས་ནད་ལ་འཐབ་ཀྱིས། །
ཧུའུ་པེའི་ཝུའུ་ཧན་གཞུང་དུ། །
ནད་དུག་རྩ་མེད་གཏོང་གིས། །
ཐུགས་བློ་ལྷོད་ལྷོད་གནང་རོགས། །
སྲིད་གཞུང་བཀའ་ལ་ཉན་རོགས། །
སྲིད་གཞུང་བཀའ་ལ་ཉན་ནས། །
རང་གིས་ཡིད་གཟབ་གནང་རོགས། །
ཝུའུ་ཧན་ཤེད་ཤུགས་ཐོན་ཤོག །
བོད་ལྗོངས་རྡོག་རྩ་འགྲིལ་ཤོག །
ནད་དུག་རྩ་མེད་བཟོས་རྗེས། །
ང་ཚོ་སླར་ཡང་མཇལ་ཡོང་། །