གཅིག

བློ་བརྟན་འགྱུར་མེད་ངང་འགག་སྒྲོལ་ཆེན་པོ་གསུམ་གྱི་ལས་དོན་ལེགས་སྒྲུབ་བྱས་ཡོད།

དབུལ་སྒྲོལ་འགག་སྒྲོལ་གྱི་ལས་འགན་ཕྱོགས་ཡོངས་ནས་ལེགས་འགྲུབ་བྱུང་བ།

ཐབས་མང་མཉམ་སྤྱོད་དང་རྒྱུན་མཐུད་འགག་སྒྲོལ་བྱས་ཏེ་སྡེབ་རྩིས་བྱས་ན་ཐོན་ལས་དབུལ་སྐྱོར་གྱི་རྣམ་གྲངས་2639ལག་བསྟར་བྱས་པ་དང་། ཡིག་ཚགས་དང་གཱ་བཟོས་པའི་དབུལ་ཕོངས་མི་གྲངས་ཁྲི་23.8དབུལ་སྒྲོལ་ཐུབ་པའི་སྐུལ་ཁྲིད་བྱས་ཡོད། དབུལ་སྐྱོར་ཡུལ་སྤོས་ལས་འགན་རྩ་བའི་ཆར་ལེགས་འགྲུབ་བྱུང་ཡོད། “ས་ངན”ཁུལ་ཧྲིལ་པོ་གྲོང་ཁྱེར་བརྒལ་བའི་གནས་སྤོ་བྱ་ཡུལ་དུ་མི་6840གནས་སྡོད་ཟིན་ཡོད། ཀྲུང་དབྱང་གི་ཆེད་དོན་སྐོར་ཞིབ་བྱས་ནས་ཚུར་ལན་སྤྲད་པའི་གནད་དོན་ལེགས་བཅོས་བྱེད་པའི་ལས་འགན་རྩ་བའི་ཆར་ལེགས་འགྲུབ་ཐུབ་ཡོད། “རིག་སྟོབས་གཉིས་སྐྱོར”བྱ་རྒྱུར་སྐུལ་འདེད་བཏང་བས་སྡེབ་རྩིས་བྱས་ན་དབུལ་པོའི་ངལ་རྩོལ་ནུས་ཤུགས་མི་ཐེངས་ཁྲི་15.5ལ་སྦྱོང་བརྡར་སྤྲས་པ་དང་། མི་ཁྲི་18.6གནས་སྒྱུར་ལས་ཞུགས་ཐུབ་ཡོད། དབུལ་ཕོངས་ས་ཁུལ་གྱི“སེམས་ཁྲལ་མེད་པ་གཉིས་དང་འགན་ལེན་གསུམ”གྱི་གནད་དོན་ཚང་མ་ཐག་གཅོད་ཐུབ་ཡོད།

ནམ་མཁའ་དེ་བས་སྔོ་ཞིང་ཆུ་བོ་དེ་བས་དྭངས་གཙང་དུ་གྱུར་པ།

སྦགས་བཙོག་ཉུང་གཏོང་གི་དམིགས་ཚད་ཚོད་འཛིན་ཡག་པོ་ཐུབ་ཅིང་། རླངས་འཁོར་གྱི་དུ་རླངས་དང་། གྲོང་ཁྱེར་གྲོང་རྡལ་གྱི་རྡུལ་སྙིགས། བསངས་ཀྱི་དུ་བ་སོགས་ཀྱི་སྦགས་བཙོག་བཅོས་སྐྱོང་ལ་ཕན་འབྲས་མངོན་གསལ་དོད་པོ་ཐོན་ནས། ས་གནས་རིམ་པའི་གྲོང་ཁྱེར་གྱི་མཁའ་རླུང་སྤུས་ཚད་ལེགས་འཁྱོངས་ཐུབ་པའི་ཉིན་གྲངས་བསྡུར་ཚད་99%ཡན་ཟིན་ཡོད། ཞིང་སྨན་དང་རྫས་ལུད་སྤྱོད་ཚད་མི་འཕར་བ་བྱས་ཡོད། འཐུང་ཆུའི་ཆུ་རྩའི་ཁོར་ཡུག་གནད་དོན་ལེགས་བཅོས་བྱེད་ཚད་དང་ཆུའི་སྦགས་བཙོག་འགོག་བཅོས་ཀྱི་བྱ་སྤྱོད་འཆར་གཞི་ལེགས་སྒྲུབ་བྱས་པ་དེ་རྒྱལ་ཡོངས་ཀྱི་མདུན་གྲལ་དུ་སླེབས་པ་དང་། ས་ངོས་ཆུའི་སྤུས་ཚད་100%ཟིན་ཡོད།

བློ་བརྟན་འགྱུར་མེད་ཀྱི་སྒོ་ནས་གོང་འཕེལ་གྱི་ཞན་ཆ་གསབ་ཡོད།

རྨང་གཞིའི་སྒྲིག་བཀོད་གང་མགྱོགས་འཐུས་ཚང་དུ་བཏང་བ།

སྡེབ་རྩིས་བྱས་ན་ཀྲུང་དབྱང་སྲིད་གཞུང་གི་མ་འཇོག་སྒོར་དུང་ཕྱུར་686དོན་འཁྱོལ་བྱས་ཡོད། བོད་སྐྱོར་རྣམ་གྲངས་ཀྱི་མ་དངུལ་སྒོར་དུང་ཕྱུར་42དོན་འཁྱོལ་བྱུང་ཡོད། མཚོ་བོད་ལྕགས་ལམ་གྱི་གོར་ལྷ་དུམ་བུའི་ནུས་པ་ཆེར་སྐྱེད་ཀྱི་བཟོ་བཅོས་ལས་གྲྭ་བསྐྲུན་ཟིན་ནས་ལས་གཉེར་བྱས་པ་དང་། ཝ་ཐོག་དང་གསེར་ཟམ་གྱི་ཆུ་གློག་ནས་གློག་གཏོང་འགོ་ཚུགས་པ། ལ་ལྷོའི་ཆུ་བེད་ལྟེ་གནས་རྐ་སྒོ་བརྒྱབ་ནས་ཆུ་གསོག་འགོ་ཚུཌ་ཡོད། གྲོང་གསེབ་ཀྱི་གློག་དྲ་སྒྱུར་བཀོད་བྱེད་པར་སྐུལ་འདེད་གང་མགྱོགས་བཏང་སྟེ་རྫོང（ཆུས）66ལ་གློག་དྲ་ཨ་མ་ཁེབས་ཡོད། རྒྱ་ཚ་དང་དྭགས་པོ་སོགས་ཀྱི་ཆུ་གློག་དང་འབྲི་ཆུའི་སྟོད་རྒྱུད་ཀྱི་ཆུ་གློག་རྟེན་གཞི་འཛུགས་སྐྲུན་བདེ་བླག་བྱུང་ཡོད། གྲོང་གསེབ་ཀྱི་གཞུང་ལམ་1288དང་ཤངས་ཆུའི་ཆུ་བེད་ལྟེ་གནས་འཛུགས་སྐྲུན་གང་མགྱོགས་བྱེད་བཞིན་ཡོད། མངའ་རིས་དང་བོད་དབུས་ཀྱི་གློག་དྲ་སྦྲེལ་བའི་ལས་གྲྭ་དང་། “དམངས་འཚོ་ཆེན་པོ་གསུམ”གྱི་རྣམ་གྲངས། ལྷ་གཞིས་རིམ་མཐོའི་གཞུང་ལམ་གྱི་གནད་ཆེའི་ལས་གྲྭ། གོར་ལྷའི་སྣུམ་འདྲེན་མདོང་ལམ། “3+1”གནམ་ཐང་ཚན་རིག་ཚོད་ལྟའི་ལས་གྲྭ་སོགས་གལ་ཆེའི་རྣམ་གྲངས་རབ་དང་རིམ་པ་སྐྲུན་འགོ་ཚུགས་ཡོད། 5Gསྤྱོད་པའི་ཚོད་ལྟ་སྤེལ་ཡོད། ཁྲོན་བོད་ལྕགས་ལམ་འཆར་འགོད་ཕྱོགས་ཡོངས་ནས་བྱེད་འགོ་ཚུགས་ཡོད།

ཐོན་ལས་ཟམ་མི་ཆད་པར་སྟོབས་ཆེར་སོང་བ།

ནས་ཐོན་འཕར་དང་འབྲི་གཡག་བཤས་གཏོང་ཚད་རྒྱུན་མཐུད་ནས་ཆེ་རུ་བཏང་ཞིང་། འབྲུ་རིགས་ཐོན་འབབ་དང་ཕྱུགས་ཟོག་འཕེལ་ཁ་རྒྱུན་མཐུད་བཟང་པོ་བྱུང་ཞིང་། ལོ་བསྟུད་མར་ཐོན་འཕར་བྱུང་སྟེ་འབྲུ་རིགས་ཀྲོན་ཁྲི་105ཟིན་པ་དང་ནས་ཀྲོན་ཁྲི་80ལས་བརྒལ་བ། ཤ་རིགས་དང་དཀར་ཆུ་ཀྲོན་ཁྲི་90ཡན་ཟིན་ཡོད། ཞིང་ཕྱུགས་ཐོན་རྫས་བཟོ་སྣོན་ལས་རིགས་ཀྱི་སྤྱིའི་ཐོན་འབབ་རིན་ཐང་སྒོར་དུང་ཕྱུར་48.9ཟིན་པ་དེ་དུས་མཚུངས་དང་བསྡུར་ན་16%འཕར་ཡོད། ཡུལ་སྐོར་ཐོན་ལས་ཀྱི་སྣེ་འདྲེན་གནས་བབ་སྔར་བས་གོང་མཐོར་སོང་ཞིང་། རྒྱལ་ཁབ་ཕྱི་ནང་གི་ཡུལ་སྐོར་བར་སྣེ་ལེན་ཞུས་པ་མི་ཐེངས་ཁྲི་4000ལས་བརྒལ་ཏེ་19%འཕར་བ་དང་། ཡོང་འབབ་སྒོར་དུང་ཕྱུར་560ཟིན་ཡོད། སྔོན་དཔག་བྱས་ན་རིག་གནས་ཐོན་ལས་ཀྱི་ཐོན་འབོར་རིན་ཐང་སྒོར་དུང་ཕྱུར་53ཟིན་རྒྱུ་ཡིན་པས་15%འཕར་ཡོད། གློག་འདོན་འཕྲུལ་ཤུགས་སྟོང་ཝ་ཁྲི་26.6འཕར་སྣོན་བྱུང་བས་གློག་གཏོང་འབོར་23.7%འཕར་བ་དང་། ཕྱིར་ཁྲིད་གློག་འདོན་འཕར་ཚད་90%ལས་བརྒལ་ཡོད། སྤྱི་ཚོགས་ཡོངས་ཀྱི་ཆ་འཕྲིན་འཛད་སྤྱོད་བྱས་འབོར་སྒོར་དུང་ཕྱུར་55ཟིན་ཡོད། སྔོན་དཔག་བྱས་ན་ཕྱིར་གཏོང་ནང་འདྲེན་གྱི་སྤྱིའི་རིན་ཐང་སྒོར་དུང་ཕྱུར་45ལས་བརྒལ་བ་དང་མཐའ་མཚམས་ཀྱི་འབོར་ཆུང་ཉོ་ཚོང་40%འཕར་ཡོད།

གསུམ

བློ་བརྟན་འགྱུར་མེད་ཀྱི་སྒོ་ནས་བསྒྱུར་བཅོས་སྒོ་དབྱེ་གཏིང་ཟབ་ཏུ་བཏང་ཡོད།

ཚོང་གཉེར་ཁོར་ཡུག་རྒྱུན་ཆད་མེད་པར་ལེགས་སུ་བཏང་བ།

“དྲ་གཅིག་སྒོ་གཅིག་ཐེངས་གཅིག”དང་། “འཁྲོལ་འཛིན་དང་ལག་ཁྱེར་ལོགས་དབྱེ” “ལག་ཁྱེར་སྤྲད་རྗེས་འཁྲོལ་འཛིན་ཉུང་གཏོང”བཅས་དོན་འཁྱོལ་བྱས་ཏེ་ཁེ་ལས་འཛུགས་པའི་འགྲོ་ལུགས་གཉེར་ཡུན་ཐུང་དུ་བཏང་ནས་ལས་ཡུན་ཉིན་5ནང་གཉེར་སྒྲུབ་ཐུབ་པ་བཟོས་ཡོད། བཟོ་ལས་དང་གཉེར་སྐྱོང་རང་བཞིན་གྱི་གཞུང་ཁོངས་འཛུགས་སྐྲུན་ལ་སྤྱོད་པའི་ས་ཆ་འོས་སྐུལ་དང་། ཧབ་འཚོང་། སྒོ་བྱང་བཀལ་ནས་ནང་བཤུག་གཏོང་བ་བཅས་བྱེད་པའི་ལམ་ལུགས་ཕྱོགས་ཡོངས་ནས་དོན་འཁྱོལ་བྱས་ཡོད། སྤྱི་པའི་ཐོན་ཁུངས་ཉོ་ཚོང་ཆ་འཕྲིན་ཡོངས་བསྒྲགས་བྱས་ཡོད། “སྐབས་བསྟུན་གཉིས་དང་ཡོངས་བསྒྲགས་གཅིག”དང་ཡིད་རྟོན་ལྟ་འདོམས་ལམ་སྲོལ་རྩ་བའི་ཆར་བཙུགས་ཡོད། ཁེ་ལས་ཀྱི་ཁུར་པོ་ཡང་དུ་ཤུགས་ཆེར་བཏང་སྟེ་ལོ་ཧྲིལ་པོར་སྔོན་དཔག་བྱས་ན་ཁྲལ་རིན་གཉིས་གཅོག་བྱས་པ་སྒོར་དུང་ཕྱུར་47.1ཟིན་པ་དང་། གྲོང་མི་དང་སྤྱིར་བཏང་གི་བཟོ་ཚོང་ལས་རིགས་ཀྱི་གློག་རིན་སླར་ཡང་10%བཅག་ཡོད། ཚོང་འགུགས་མ་འདྲེན་གྱི་མ་འཇོག་སྒོར་དུང་ཕྱུར་360ལེགས་འགྲུབ་ཟིན་ཞིང་། ལོ་ཧྲིལ་པོའི་དམིགས་ཚད་ཚད་བརྒལ་ལེགས་འགྲུབ་བྱུང་ཡོད།

ནང་སྐྱེས་སྒུལ་ཤུགས་ཟམ་མི་ཆད་པར་ཆེ་རུ་སོང་བ།

ལམ་ལུགས་ཐོག་ནས་འགན་སྲུང་བྱེད་པར་ཤུགས་སྣོན་རྒྱག་པ་དང་སྲིད་ཇུས་དོན་འཁྱོལ་བྱེད་ཤུགས་ཆེ་རུ་བཏང་སྟེ་གཙོ་རྒྱུ་མཁོ་འདོན་བྱེད་པར་སྐུལ་སློང་བྱས་ཡོད། ཆ་སྙོམས་ཉིན་རེར་ཁྲོམ་རའི་བྱེད་པོ་200ལྷག་ཙམ་མང་དུ་སོང་ནས་ཐེམ་དུད་སྤྱི་འབོར་ཁྲི་32.5ཟིན་པ་དང་ཐོ་འཁོད་མ་དངུལ་སྒོར་དུང་ཕྱུར་ཁྲི་1.5ཟིན་ཡོད། ཞིང་དུད་ཀྱི་དངུལ་བུན་11.9%འཕར་བ་དང་། ཁེ་ལས་ཆུང་ཕྲན་གྱི་དངུལ་བུན་ལྷག་འབོར་21%འཕར་བ། ཀུན་ཕན་དངུལ་རྩའི་ཁྱབ་ཁོངས་ཀྱི་དངུལ་བུན་31.8%འཕར་ཡོད། ཞིང་འབྲོག་པ་ཁྲི་40ཡུལ་སྐོར་ཐོན་ལས་ནང་ཞུགས་པ་དང་ཐོན་ལས་གཉིས་པ་དང་གསུམ་པར་ལས་གཉེར་བྱེད་མཁན་མི་གྲངས་ཁྲི་125ལས་བརྒལ་བས་མང་ཚོགས་ཀྱི་ལས་གཏོད་ཧུར་སེམས་ཤུགས་ཆེར་འཕེལ་ཡོད།

ཕྱི་ཕྱོགས་སྒོ་མོ་འབྱེད་པར་སྐུལ་འདེད་ཧུར་ཐག་བཏང་བ།

འགྲམ་འགག་སྒོའི་ཟོག་འདྲེན་བྱེད་ནུས་སླར་གསོ་བྱས་པ་དང་། ལ་རྩེ་འགག་སྒོ་སྒོ་མོ་ཕྱེ་བ། མངའ་རིས་དགུན་ས་གནམ་ཐང་གནས་སྐབས་སྒོ་མོ་ཕྱེ་བ། སྐྱིད་རོང་གི་མཐའ་མཚམས་དཔལ་འབྱོར་མཉམ་ལས་ཁུལ་གྲབས་འཛུགས་བྱེད་རྒྱུ་དང་། འདྲེན་ཐང་དང་རི་འོག་འགག་སྒོ་སྒོ་མོ་འབྱེད་རྒྱུར་སྐུལ་འདེད་ཧུར་ཐག་བཏང་ཡོད། ལྷ་སའི་ཕྱོགས་བསྡུས་ཁྲལ་མེད་ཁུལ་རེ་ཞུ་བདེ་བླག་ངང་སྤེལ་བཞིན་ཡོད། ནེ་པ་ལར་རོགས་སྐྱོར་བྱེད་པའི་རྣམ་གྲངས་རིགས་ཁག་12གཉེར་ཞིང་། ཀྲུང་ནེ་མཛའ་གྲོགས་བཟོ་ལས་གླིང་སོགས་རྣམ་གྲངས་5ཡི་མཉམ་ལས་གྲོས་མཐུན་ལ་མིང་རྟགས་བཀོད་པ་དང་། ལྷ་སར་བཅའ་སྡོད་ནེ་པ་ལའི་སྤྱི་ཁྱབ་གཞུང་ཚབ་ཁང་གི་གཞུང་ཁང་བཟོ་བཅོས་ལས་མཇུག་བསྒྲིལ་ཡོད། ཕྱི་རྒྱལ་བ་བོད་ལ་ཡུལ་སྐོར་དུ་ཡོང་བར་ཞབས་ཞུ་དང་དོ་དམ་བྱེད་པའི་ཐད་སྟབས་བདེ་བསྐྲུན་རྒྱུའི་ལས་དོན་ཧུར་ཐག་སྤེལ་ཡོད། རྒྱལ་སྤྱི་རྒྱལ་ནང་གི་མཁའ་འགྲུལ་ལམ་ཐིག་10མང་དུ་བཏང་ཡོད། ཧི་མ་ལ་ཡ་མཁའ་འགྲུལ་ཀུང་སིའི་རྐང་དབང་ལེགས་སྒྲིག་ཟིན་པ་དང་པེ་ཅིང་ནས་ཀ་ཏ་མན་ཏུ་བར་གྱི་མཁའ་ལམ་ཤར་གཏོང་ཐུབ་ཡོད།