● “ན་ནིང་། ཐེན་ཅིན་གྱི‘ཚོགས་སྒྲིག་རྣམ་པའི’བོད་སྐྱོར་དགེ་རྒན་15སློབ་གྲྭ་དེར་ཡོང་ནས་རྒྱའི་སྐད་ཡིག་དང་། ཨང་རྩིས། རོལ་དབྱངས། རི་མོ་བཅས་ཀྱི་སློབ་ཚན་ཁྲིད་ཡོད།

● “‘ཚོགས་སྒྲིག་རྣམ་པའི’བོད་སྐྱོར་བྱས་ཚུན། ཆབ་མདོ་སྨན་ཁང་བདེ་བླག་ངང་ཀ་པ་རིམ་པ་གསུམ་པའི་སྨན་ཁང་ལ་གྱུར་པ་མ་ཟད། སྨན་བཅོས་ཀྱི་ཆུ་ཚད་ཀྱང་མཐོ་རུ་ཕྱིན་ཡོད”

འདི་ག་ཚགས་པར་ཁང་དུ་ལྷ་ས་ནས་ཟླ་7ཚེས་28ཉིན་གློག་འཕྲིན་འབྱོར་གསལ། ཉེ་ཆར། གསར་འགོད་པ་བོད་ལྗོངས་ཆབ་མདོ་གྲོང་ཁྱེར་དུ་བཅར་འདྲིར་སྐྱོད་སྐབས། སློབ་གསོའི་ཤེས་ལྡན་མི་སྣ་དང་སྨན་བཅོས་ཤེས་ལྡན་མི་སྣ་ལས་གྲུབ་པའི“ཚོགས་སྒྲིག་རྣམ་པའི”བོད་སྐྱོར་གྱིས་དེ་གའི་སློབ་གསོ་དང་སྨན་བཅོས་སོགས་ཀྱི་དམངས་འཚོའི་ཁྱབ་ཁོངས་ལ་དགའ་འོས་པའི་འགྱུར་ལྡོག་ཆེན་པོ་བྱུང་བ་མཐོང་བྱུང་། གསར་འགོད་པས་བཅར་འདྲི་བྱེད་སྐབས་གྲོང་མི་ཚོའི་སེམས་གཏིང་གི་དགའ་སྣང་ངང་གིས་མངོན་འོང་གི་འདུག

གསར་འགོད་པ། ཀྲུང་གོ་གུང་ཁྲན་ཏང་གིས་བོད་དུ་གཉེར་བའི་དེང་རབས་ཀྱི་སློབ་ཆུང་དང་པོ་སྟེ། ཆབ་མདོ་གྲོང་ཁྱེར་ཚོད་ལྟའི་སློབ་ཆུང་དུ་བསྐྱོད་པ་ཡིན། སློབ་ཆུང་སློབ་མ་བསྟན་འཛིན་རྒྱལ་མཚན་གྱིས་སློབ་ཁང་དུ་དགའ་མོས་སློབ་ཚན་ལ་མི་མེད་གནམ་གྲུ་སྤྱོད་སྟངས་སྦྱོང་བཞིན་པ་མཐོང་བྱུང་།

དགའ་མོས་འཛིན་གྲྭའི་མཛུབ་ཁྲིད་དགེ་རྒན་ཅིན་ཙི་ཆིས་ནི་ན་ནིང་སློབ་གྲྭ་དེར་འོང་བ་དང་། བོད་དུ་མ་ཡོང་གོང་ཐེན་ཅིན་སློབ་ཆུང་ཞིག་གི་ཚན་རྩལ་དགེ་རྒན་རེད། ཁོང་དང་བོད་སྐྱོར་དགེ་རྒན་གཅིག་པ་ཡིན་པའི་སློབ་སྤྱི་ལི་ཏུང་རུས་དགའ་མོས་འཛིན་གྲྭར་སྤྱོད་པའི་མི་མེད་གནམ་གྲུ་དེ་དག་ནི་ཐེན་ཅིན་གྱི་ཁེ་ལས་ཤིག་གིས་ཞལ་འདེབས་བརྒྱབ་པ་ཞིག་རེད། ད་དུང་སློབ་གྲྭས་དགའ་མོས་འཛིན་གྲྭའི་སློབ་མ་ཚོས་མི་མེད་གནམ་གྲུ་བཀོལ་སྤྱོད་བྱེད་སྟངས་ཤེས་རྗེས་ལྗོངས་ཕྱིའི་འགྲན་བསྡུར་ལ་ཞུགས་སུ་འཛུགས་རྩིས་ཡོད་ཅེས་ངོ་སྤྲོད་བྱས།

“ན་ནིང་། ཐེན་ཅིན་གྱི‘ཚོགས་སྒྲིག་རྣམ་པའི’བོད་སྐྱོར་དགེ་རྒན་15སློབ་གྲྭ་དེར་ཡོང་ནས། རྒྱའི་སྐད་ཡིག་དང་། ཨང་རྩིས། རོལ་དབྱངས། རི་མོ་བཅས་ཀྱི་སློབ་ཚན་ཁྲིད་པ་དང་། ང་ནི་རྒྱའི་སྐད་ཡིག་འཁྲིད་མཁན་ཡིན”ཞེས་ལི་ཏུང་རུས་བཤད།

སློབ་གྲྭའི་དེ་སྔའི་ཏང་ཀྲི་པུའི་ཧྲུའུ་ཅི་རྒན་ཡོལ་ཞུས་པའི་དགེ་རྒན་བྱམས་པ་ཆོས་གྲགས་ཀྱིས། ཉེ་བའི་ལོའི་ནང་སློབ་གྲྭའི་དགེ་རྒན་གྱི་ལོའི་གྲུབ་ཆ་སྔར་བས་ལེགས་སུ་ཕྱིན་ནས། ལོ་གཞོན་དགེ་རྒན་མང་དུ་སོང་སྟེ་གསར་གཏོད་ཀྱི་སྐྱེ་སྟོབས་རྒྱས་ཡོད་ཅེས་བཤད། ཁོང་གིས“དགེ་རྒན་རྙིང་པ་ཞིག་ཡིན་པའི་ངོས་ནས། སློབ་གྲྭར་འགྱུར་ལྡོག་དེ་ལྟར་བྱུང་བར་རང་ཉིད་ཧ་ཅང་དགའ་པོ་བྱུང”ཞེས་སེམས་གཏིང་ནས་དགའ་ཚོར་སྐྱེ་བཞིན་དུ་བཤད།

དགའ་འོས་པའི་གྲུབ་འབྲས། སྨན་བཅོས་ཤེས་ལྡན་པའི“ཚོགས་སྒྲིག་རྣམ་པའི”བོད་སྐྱོར་བྱ་ཡུལ་ཆབ་མདོ་གྲོང་ཁྱེར་མི་དམངས་སྨན་ཁང་ལའང་བྱུང་ཡོད།

ཏོག་གསར་གློ་ཚད་ཀྱི་རིམས་ནད་ལ་འགོག་རྒོལ་བྱེད་པའི་སྐབས་སུ། ང་ཚོའི་སྨན་ཁང་གིས་ཟླ་གཉིས་པར་རིམས་ནད་སྔོན་འགོག་དང་ཚོད་འཛིན་གྱི་ཤེས་བྱའི་སྐོར་གྱི་རྒྱ་བོད་ཡིག་རིགས་གཉིས་ཀྱི་ལག་དེབ་ཆུང་ངུ་རྩོམ་འབྲི་བྱས་ནས་དཔེ་སྐྲུན་བྱས་པ་མ་ཟད། རིམས་འགོག་དངོས་ཟོག་ཀྱང་དུས་ཐོག་ཏུ་གནས་སར་འབྱོར་པའང་བྱས་ཡོད”ཅེས་གསར་འགོད་པས་བཅར་འདྲི་བྱེད་སྐབས། ཆབ་མདོ་གྲོང་ཁྱེར་མི་དམངས་སྨན་ཁང་གི་ཡོན་ཀྲང་ཅང་ཡིང་ཅིའུ་ཡིས་སྨན་ཁང་གི་ཉེ་དུས་འཕེལ་རྒྱས་བྱུང་ཚུལ་ངོ་སྤྲོད་བྱས།

ཤེས་རྟོགས་བྱུང་བར་གཞིགས་ན། ཅང་ཡིང་ཅིའུ་ནི“ཚོགས་སྒྲིག་རྣམ་པའི”བོད་སྐྱོར་སྨན་བཅོས་ཀྱི་ཤེས་ལྡན་པའི་གྲས་ཡིན་པ་དང་། དེ་སྔོན་ཁྲུང་ཆིང་གསོ་རིག་སློབ་ཆེན་གྱི་ཞོར་གཏོགས་སྨན་ཁང་དང་པོའི་བྲང་སྙིང་ཕྱི་ནད་སྨན་བཅོས་ཀྱི་རིགས་གཅིག་མཁས་ཅན་ཞིག་ཡིན་པ་དང་། ན་ནིང་ཟླ་བདུན་པར་བོད་དུ་འོང་བ་ཞིག་རེད།

གསར་འགོད་པ་སྨན་ཁང་ནས་དོན་པའི་སྐབས་སྒོ་བསྟེན་ཐོག་བརྩེགས་ཁང་གི་ཚོམས་ཆེན་བརྒྱུད་དགོས་ཀྱི་ཡོད། ཚོམས་ཆེན་ནང་དུ་ཁྲུང་ཆིང་བོད་སྐྱོར་སྨན་བཅོས་རུ་ཁག་གི་རུ་མིའི་པར་མང་པོ་སྦྱར་འདུག་པས་ས་མཐོའི་མི་དམངས་ཀྱིས་གོས་དཀར་སྨན་པ་དེ་དག་ལ་ཁས་ལེན་ཞུས་པ་དང་བཀའ་དྲིན་ཚོར་བ་གང་ལེགས་མངོན་ཡོད།

（པ་སངས་ཚེ་རིང་གིས་བསྒྱུར། བསོད་ནམས་བདེ་སྐྱིད་ཆུང་བ་དང་པ་ཚེས་ཞུས）