《西藏日报》 《西藏日报藏文版》 《人民日报藏文版》 《西藏商报》 《西藏法制报》 《西藏法制报藏文版》

2020年01月13日

ཨ་རིའི་འཛད་སྤྱོད་གློག་རྡུལ་འགྲེམས་ཚོགས་གཙོ་གཉེར་མཁན་གྱིས།

ཀྲུང་གོའི་ཁེ་ལས་ཀྱི་གསར་གཏོད་ནུས་པ“ཉིན་རེ་བཞིན་ ཆེ་རུ་འགྲོ་བཞིན་ཡོད”ཅེས་བརྗོད་པ།

ཤིན་ཧྭ་གསར་འགྱུར་ཁང་ཨ་རིའི་གྲོང་ཁྱེར་ལཱ་སི་ཝེ་ཅཱ་སི་ནས་གློག་འཕྲིན་འབྱོར་གསལ། 2020ལོའི་ཨ་རིའི་ལཱ་སི་ཝེ་ཅཱ་སིའི་འཛད་སྤྱོད་གློག་རྡུལ་འགྲེམས་སྟོན(CES)ཉེ་ཆར་དངོས་སུ་གཉེར་འགོ་ཚུགས་ཤིང་། འགྲེམས་ཚོགས་གཙོ་གཉེར་མཁན་ཨ་རིའི་འཛད་སྤྱོད་ལག་རྩལ་མཐུན་ཚོགས་ཀྱི་ཀྲུའུ་ཞི་ཅཱ་ལི·ཞཱ་ཕི་ལུའོ་ཡིས་ཉིན་ཤས་གོང་ཤིན་ཧྭ་གསར་འགྱུར་ཁང་གི་གསར་འགོད་པར། ཀྲུང་གོའི་ཁེ་ལས་བརྒྱ་ཕྲག་ཁ་ཤས་ཀྱིས་ཚན་རྩལ་གསར་གཏོད་ཀྱི་གྲུབ་འབྲས་ཁྱེར་ནས་སྐབས་འདིའི་འགྲེམས་ཚོགས་ལ་ཞུགས་རྒྱུ་ཡིན་ཞིང་། ཀྲུང་གོའི་ཁེ་ལས་ཀྱི་གསར་གཏོད་ནུས་པ“ཉིན་རེ་བཞིན་ཆེ་རུ་འགྲོ་བཞིན་འདུག”ཅེས་བརྗོད་པ་རེད།

ཞཱ་ཕི་ལུའོ་ཡིས། པའེ་ཐེང་དང་། ཁྲང་ཧུང་། ཏཱ་ཅང་། ཧའེ་ཨར། ཧའེ་ཤིན། ཧྭ་ཝེ། ཁང་ཅཱ། ལེན་ཞང་། TCL ཀྲུང་ཤིང་སོགས་ཚུད་པའི་ཀྲུང་གོའི་ཁེ་ལས་གྲགས་ཅན་ཁག་ཡང་བསྐྱར་CESལ་ཞུགས་ནས། ཁྱབ་ཁོངས་མི་འདྲ་བའི་ཚན་རྩལ་ཐོན་རྫས་གསར་ཤོས་འགྲེམས་སྟོན་བྱ་རྒྱུ་རེད་ཅེས་བརྗོད་པ་རེད།

ཉེ་བའི་ལོ་ཤས་རིང་། CESའགྲེམས་ཚོགས་ཐོག་གི་ཀྲུང་གོའི་ཁེ་ལས་ཀྱི་གྲུབ་འབྲས་ཡག་པོ་ཡོད། ཞཱ་ཕི་ལུའོ་ཡིས། ཨ་ཀྲུང་གི་ཚན་རྩལ་ཁྱབ་ཁོངས་ཀྱི་མཉམ་ལས་བྱེད་རྒྱ་ཆེ་རུ་གཏོང་རྒྱུ་ཧ་ཅང་གལ་ཆེན་པོ་ཞིག་ཡིན་ཞེས་བརྗོད་པ་དང་། ཁོང་གིས། གསར་གཏོད་བྱེད་པའི་བརྒྱུད་རིམ་ཁྲོད་ཤེས་བྱའི་བདག་དབང་ལ་མུ་མཐུད་མཐོང་ཆེན་བྱེད་པ་དང་། ཀྲུང་གོའི་ཁེ་ལས་ཀྱི་གདེང་ཚོད་སྔར་བས་ཆེ་རུ་ཕྱིན་ནས། ཚན་རྩལ་གསར་གཏོད་གྲུབ་འབྲས་གོ་ལ་ཧྲིལ་པོའི་ཁྱབ་ཁོངས་སུ་རྒྱུན་ཆད་མེད་པར་ཁྱབ་གདལ་གཏོང་ཐུབ་རྒྱུ་ཡིན་པའི་ངོས་འཛིན་བྱེད་ཀྱི་ཡོད་པ་རེད།

ངོ་སྤྲོད་བྱས་པར་གཞིགས་ན། དུས་ཡུན་ཉིན་བཞིའི་CESའགྲེམས་ཚོགས་ཐོག་རྒྱལ་ཁབ་དང་ས་ཁུལ་160ལྷག་ཙམ་གི་ཚོགས་ཞུགས་པ་ཁྲི་17ཙམ་ཞུགས་རྒྱུ་ཡིན་པ་དང་། འགྲེམས་ཞུགས་ཁེ་ལས་4500ལྷག་ཙམ་གྱིས་ཚན་རྩལ་གསར་གཏོད་ཐོན་རྫས་ཁྲི་2ཙམ་འགྲེམས་སྟོན་བྱ་རྒྱུ་ཡིན་པ་རེད། ཞཱ་ཕི་ལུའོ་ཡིས། CESསྐབས་ཚང་མའི་ཐོག་འབྱུང་འགྱུར་འཚོ་བར་འགྱུར་ལྡོག་ཆེན་པོ་ཐེབས་པའི་གསར་སྒྱུར་རང་བཞིན་གྱི་ཚན་རྩལ་འགྲེམས་སྟོན་བྱེད་ཀྱི་ཡོད། འདི་ལོའི་འགྲེམས་ཚོགས་ཐོག་ཀུན་གྱིས་དོ་སྣང་བྱེད་མང་བའི་ཚན་རྩལ་གྲུབ་འབྲས་ནང་5Gདང་སྒུལ་བདེའི་མཉམ་འབྲེལ་ཁྱབ་ཁོངས་ཀྱི་འཕེལ་རིམ་གསར་ཤོས་དང་། དེ་བཞིན་རླངས་འཁོར་ཚན་རྩལ་དང་། རིག་ལྡན་གྲོང་ཁྱེར། གྲངས་གཞིའི་སྨན་བཅོས་སོགས་ཚུད་ཡོད་ཅེས་བརྗོད་པ་རེད།

(དམ་ཆོས་མི་ཕམ་གྱིས་བསྒྱུར། པ་སངས་སྒྲོན་ལགས་ཀྱིས་ཞུས)