བོད་ཀྱི་བཀྲ་ཤིས་ལོ་གསར། །
འཇབ་ནས་འཁྲིས་སུ་བཅར་བྱུང་། །
ཕྱོགས་འགྲུལ་གར་འགྲོ་ངེས་མེད། །
རང་འགྲོ་རང་གིས་ཚོད་བྱེད། །
ཤར་འགྲོ་ནུབ་འགྲོའི་ས་ལ། །
སྐྱེ་བོ་སྣ་མིན་སྣ་ཚོགས། །
ནད་དུག་རང་ལ་ཡོད་པ། །
ནད་པ་ཡིས་ཀྱང་མ་ཤེས། །
སྐྱེ་བོ་སུ་དང་གང་ལ། །
དོགས་ཟོན་བྱས་ན་དགེ་ཡིན། །
དོགས་ཟོན་བྲལ་བའི་སྐྱེ་བོ། །
ཀླ་ཀློ་སྨྱོན་པའི་ཚུལ་ལོ། །
ཏོག་གསར་གློ་ཚད་འགོག་པའི། །
ཐབས་ཀྱི་མཆོག་ཏུ་གྱུར་པ། །
རང་ཁྱིམ་གྲུ་བཞིའི་ནང་ལ། །
ལྷོད་པོར་སྡོད་པ་ཡིན་ནོ། །
གཞན་ལ་ལས་ལ་གཞོལ་བ། །
ཐེག་པ་ཆེན་པོའི་ཆོས་ཡིན། །
མ་ཕན་གནོད་དོགས་མེད་པ། །
ཐེག་པ་ཆུང་ངུའི་ཆོས་ཡིན། །
སྨན་དོན་བྱ་བར་ཕན་པའི། །
དོན་ཆེན་བསྒྲུབ་ནུས་བྲལ་ཡང་། །
ཀུན་ལ་གནོད་དོགས་བསམས་ནས། །
མི་ཚོགས་ཡོད་སར་མ་འགྲོ། །
ཁ་རས་ཕྱེད་ཙམ་བརྒྱབ་ནས། །
ཁ་ནས་མ་ཎི་འདོན་བཞིན། །
ཁ་ཆུ་སྣ་ཆུ་འཛར་འཛར། །
ཁྲོམ་སྲང་ཉུལ་བར་མ་ཕེབས། །
ལོ་གསར་མཁོ་ཆས་ཉོ་ཟེར། །
ཁ་ཟས་སྡེར་ཁ་ཉོ་ཟེར། །
རྒན་རྒོན་ཕྲུ་གུ་འཁྲིད་ནས། །
ཁྲོམ་སྲང་ཉུལ་བར་མ་ཕེབས། །
རྡོ་གཡམ་སྟེང་གི་ཕྱེ་མར། །
གྲོ་སྙེ་གཅིག་ལས་མེད་ཀྱང་། །
བཀྲ་ཤིས་གནམ་ལོ་བསུས་པའི། །
ལོ་རྒྱུས་སྟོང་ལ་བགྲང་ཡོད། །
སྡེར་ཁ་རྒྱས་པོ་མི་དགོས། །
ཞལ་ཟས་སྣ་ཚོགས་མི་དགོས། །
བོད་ཁམས་ནད་ཡམས་མེད་ན། །
བཀྲ་ཤིས་ལོ་གསར་དེ་ཡིན། །
སེར་སྐྱ་ཕོ་མོ་རྒན་གཞོན། །
རྒྱ་ཟོག་ཁྲོམ་རྭར་འཛོམས་ནས། །
ལོ་གསར་གཟབ་སྤྲོས་ཉོ་ཟེར། །
ཚང་ཁ་རྒྱག་ལ་མ་འགྲོ །
གོན་རྒྱུའི་གཟབ་སྤྲོས་མེད་པར། །
མ་འདོད་ནད་ཡམས་ཉོས་ཡོང་། །
དེ་ལས་རང་ཁྱིམ་གྲུ་བཞིར། །
རང་རང་སྤྱོད་པ་སྐྱོངས་ཤིག །
འདི་ལོའི་ལོ་གསར་འདི་ལ། །
ཞིམ་ཞིམ་མངར་མངར་མ་དགོས། །
གཟབ་སྤྲོས་འཛོམ་འཛོམ་མི་དགོས། །
ནད་ཡམས་བགེགས་བར་མི་དགོས། །